ក្នុងពិធីរៀបមង្គលការរបស់ខ្មែរយើង បើរៀបរាបទៅមានច្រើនយ៉ាងណាស់ ក៏ប៉ុន្តែបច្ចុប្បន្ន ពិធីមង្គលការត្រូវបានគេធ្វើកាត់ៗ និងបែបសង្ខេប ដើម្បីបង្គ្រប់កិច្ចតែប៉ុណ្ណោះ ។ ធាតុពិត មង្គលការ ឲ្យត្រូវក្បួនខ្នាតបុរាណខ្មែរ គឺមានរយៈពេល ៣ ថ្ងៃឯណោះ ។ វេលា ៣ថ្ងៃនេះគេឃើញថា ប៉ែកខាងប្រជាជននៅបាត់ដំបង មានតំបន់ខ្លះអាចប្រារពធ្វើបានខ្លះៗ តែមិនបានពេញបែបបទឲ្យអស់នោះទេ ។
បើតាមការរ៉ាយរាប់រៀបអាចារ្យម្នាក់ ក្នុងទឹកដីបាត់ដំបងបានប្រាប់ឲ្យដឹងថា ពិធីមង្គលការ នៅពេលបច្ចុប្បន្ន ត្រូវបានគេធ្វើឡើងតាមបែបសង្ខេប គ្រាន់តែឲ្យដូនតា ដឹងឭតែប៉ុណ្ណោះ តែមិនបានធ្វើឲ្យ គ្រប់ជ្រុងជ្រោយ ឡើយ ។ លោកអាចារ្យ បានបន្តថា ពិធីមង្គលការមានច្រើនណាស់ ក្នុងនោះ មាន ពិធីគាស់ខ្ញែរ ពិធីរាំខ្វែងពែង ពិធីបុកសាច់ជូរ ពិធីបុកល័ក្ត ពីធីជីកស្រះ ឬជីកអណ្តូង ពិធីកាត់ស្លឹក ពិធីលាយល័ក្ត ពីធីស្ងោរល័ក្ត ពិធីបៀមល័ក្ត និងពិធីជាច្រើនទៀត ។ តែលោកសូមលើកយកតែពីធីមួយមកបង្ហាញសិន ក្នុងនោះគឺពិធីជីកស្រះ ឬអណ្តូង ដែលមានអត្ថន័យដូចខាងក្រោមនេះ ៖
ពិធីជីកស្រះ ឬ ជីកអណ្ដូងនេះ មានអ្នកភ្លេង ៤នាក់ឈរកាន់ចប កាប់ចបជីក ច្រៀងធ្វើកាយវិការជីកដី ហាក់ដូចជាមានការហត់នឿយខ្លាំង អំពីការជីកស្រះ ឬជីកអណ្ដូងយកទឹកមកលាយល័ក្ដធ្វើថ្នាំធ្មេញ ឱ្យកូនស្រីបៀម។ ពិធីនេះ គេត្រូវច្រៀងបទចម្រៀងមានទំនុកថា៖
- ថ្ងៃជាឧត្តម ថ្ងៃជាឧត្តម
លោកមេបាប្រើខ្ញុំ ឱ្យរាំជីកអណ្ដូង។
ឱទងវងខ្ញុំអើយ ឱ្យរាំជីកអណ្ដូង។
- គ្នាយើង៤នាក់ ដើរអីរយោង
លោកមេបាប្រើយើង ឱ្យរាំជីកអណ្ដូង។
ឱទងវងខ្ញំអើយ ឱ្យរាំជីកអណ្ដូង។
- ជីកទៅជីកមក បានដីក្រហូង
ខ្ញុំរាំជីកអណ្ដូង យកទឹកលាយល័ក្ដ។
ឱទងវងខ្ញុំអើយ យកទឹកលាយល័ក្ដ។
សូមបញ្ជាក់ថាទឹកអណ្ដូងដែលជីកយកបានមកនោះ ជាទឹកផ្អែម ជាទឹកមានរស់ជាតិឆ្ងាញ់ ។
ប្រសិនបើពិធីរៀបអាពាហ៍ពិពាហ៍នោះ មានពេលវែងល្អ អ្នកភ្លេងរៀបពិធីកំប្លែង ដោយខ្លួនមុជទឹក ទឹកចូលត្រចៀក ខ្លះទះ ខ្លះផ្លុំ ខ្លះត្បារ...។ បើនៅតែមិនចេញត្រូវបញ្ជាប់មេមត់ព្រៃ សួរអំពីមូលហេតុផ្សេងៗ ថាតើមានការខុសទាស់បែបណា? មេមត់ព្រៃឆ្លើយថា មិនសុំអនុញ្ញាតពីគេ ដើរជាន់ក្បាលគេ នោមដាក់គេ ទើបសុំអង្វរកថ្វាយអាការសាហាវទើបបានទឹកចេញពីត្រចៀក។
រៀបចំអត្តបទដោយ : មាន វិចិត្ត
